Садыр Жапаров "Бишкек Аренадагы" даярдык иштерин көрүп чыкты
Президент Садыр Жапаров "Бишкек Арена" стадионуна барып, VI Дүйнөлүк көчмөндөр оюндарынын ачылыш аземине карата жүргүзүлүп жаткан даярдык иштерин көрүп чыкты.
Президенттин администрациясынын маалыматына ылайык, мамлекет башчысы стадиондун инфраструктурасы, анын аймагындагы негизги объектилер жана комплекстин коомдук зоналарынын бири болгон соода борбору менен таанышты.
Даярдык иштеринин алкагында ачылыш аземин уюштуруу, ошондой эле оюндардын катышуучулары менен коноктору үчүн бардык зарыл шарттарды түзүүгө өзгөчө көңүл бурулуп жатканы белгиленди.
Мындан тышкары, Президентке алдыдагы ачылыш аземинин айрым эпизоддору көрсөтүлдү.
Белгилей кетсек, VI Дүйнөлүк көчмөндөр оюндары Кыргызстанда 31-августтан 6-сентябрга чейин өтөт. Мелдештерге дүйнөнүн ар кайсы өлкөлөрүнөн келген спортчулар катышып, улуттук спорттун түрлөрү жана этномаданий дисциплиналар боюнча күч сынашат.
