Садыр Жапаров "Ырыс Ордо" Конгресс-борборунун ачылышына даярдыкты текшерди
Президент Садыр Жапаров күн мурун Бишкек шаарындагы "Ырыс Ордо" Конгресс-борборуна барып, объекттин расмий ачылышына карата даярдык иштерин текшерди.
Президенттин администрациясынын маалыматына ылайык, 14,7 гектар аянтты ээлеген комплекстин курамына борбордук имарат жана расмий делегациялар менен жогорку даражалуу конокторду кабыл алууга арналган сегиз мейман үйү кирет.
Конгресс-борбор эл аралык саммиттерди, форумдарды, расмий кабыл алууларды, сүйлөшүүлөрдү жана башка жогорку деңгээлдеги мамлекеттик иш-чараларды өткөрүүгө ылайыкташтырылган.
Мамлекет башчысы борбордук имараттагы негизги функционалдык аймактарды жана залдарды көрүп чыкты. Анда 1238 орундуу "Курултай" конференц-залы, 1000 адамга ылайыкталган банкет залы, 235 орундуу пресс-зал, ошондой эле эки тараптуу жолугушууларды өткөрүү үчүн атайын залдар жайгашкан.
Ошондой эле Президент расмий делегациялардын жетекчилери үчүн курулган мейман үйлөрүнүн даярдыгы менен таанышып, аларда жашоо, иш алып баруу жана эс алуу үчүн бардык зарыл шарттар түзүлгөнүн белгиледи.
Сапардын жыйынтыгында Садыр Жапаров аткарылган курулуш иштеринин сапатына жогору баа берип, комплекстин расмий ачылышка даярдык деңгээлине канааттанганын билдирди.
Мындан тышкары, ал алдыдагы эл аралык иш-чараларды жогорку деңгээлде уюштуруу үчүн бардык тиешелүү кызматтардын биргелешип жана так иш алып баруусунун маанилүүлүгүн белгиледи.
Белгилей кетсек, "Ырыс Ордо" Конгресс-борборунун расмий ачылышы 24-августта өтөт.
