Баткен менен Фергананын туристтик кызматташтыгы бекемделүүдө
Баткен облусунун журналисттери Өзбекстандын Фергана облусуна уюштурулган маалыматтык турга катышып, аймактын туристтик жана маданий мүмкүнчүлүктөрү менен таанышышты.
Аймактык өкүлчүлүктүн басма сөз кызматы билдиргендей, иш-чаранын максаты — Баткен менен Фергананын ортосундагы медиа жана туризм тармагындагы кызматташтыкты өнүктүрүү.
Журналисттер Фергананын тарыхый жайларын, кол өнөрчүлүк жана жибекчилик борборлорун, ошондой эле Фергана IT паркы, "Фергана Экспо" борбору жана Маргалаңдагы "Бурханиддин Маргалани" комплексин көрүп чыгышты.
Жолугушууда эки облустун ортосундагы достук мамилелерди чыңдоо, туризм, маданият жана маалымат тармактарында биргелешкен долбоорлорду ишке ашыруу маселелери талкууланды.
Белгиленгендей, иш-чара Кыргызстан менен Өзбекстандын президенттери кол койгон кызматташтык келишимдеринин жана Баткен – Фергана жол картасынын негизинде уюштурулду.
