Башкы прокуратура менен Евробиримдик кызматташтыкты кеңейтет
Кыргызстандын Башкы прокуратурасында Башкы прокурордун милдетин аткаруучу М.М. Бектурганов Европа Бирлигинин Кыргызстандагы Атайын жана Ыйгарым укуктуу Элчиси Реми Дюфло менен жолугушту.
Башкы прокуратуранын маалыматына ылайык, жолугушууда укуктун үстөмдүгүн жана жазык сот адилеттигин бекемдөө жаатындагы кызматташтыктын негизги багыттары талкууланды.
Анын ичинде жазык сот өндүрүшүн санариптештирүү, киберкылмыштуулукка каршы күрөшүү, финансылык иликтөөлөрдү жүргүзүү жана кылмыштуу жол менен алынган активдерди кайтаруу маселелерине көңүл бурулду.
Ошондой эле Кыргызстандын жазык сот өндүрүшү жаатындагы Европалык конвенцияларга кошулуусу, прокурорлордун квалификациясын жогорулатуу жана алардын Европа Бирлигинин программаларына практикалык катышуусун кеңейтүү маселелери каралды.
Жолугушуунун жыйынтыгында тараптар Кыргызстан менен Европа Бирлигинин ортосундагы өнөктөштүктү жана практикалык кызматташтыкты мындан ары өнүктүрүүгө даяр экенин билдиришти.
