Гендердик зомбулук боюнча улуттук изилдөөнүн жыйынтыктары талкууланды
Эмгек, социалдык камсыздоо жана миграция министрлигинде гендердик зомбулуктун алдын алуу жана жабыр тарткан адамдарды коргоо боюнча маселелер каралды. Бул тууралуу министрликтин басма сөз кызматы билдирди.
Маалыматка ылайык, бул көйгөйлөр 24-августта өткөн гендердик зомбулук боюнча улуттук изилдөөнүн алдын ала жыйынтыктарын талкуулоого арналган жолугушууда көтөрүлдү.
Эмгек министрдин орун басары Аида Исатбек кызынын айтымында, Кыргызстанда гендердик жана үй-бүлөлүк зомбулукка каршы аракеттенүү боюнча тиешелүү укуктук база түзүлгөн.
Анын ичинде үй-бүлөлүк зомбулуктан коргоо жана алдын алуу боюнча мыйзам, коргоо ордерлерин электрондук мониторингдөө мүмкүнчүлүгү, ошондой эле пробация кызматынын түзөтүү программалары сыяктуу механизмдер иштейт.
Мындан тышкары, 2026-жылдын 17-июлунда президент гендердик теңчилик маселелери боюнча мыйзамдарга өзгөртүүлөрдү киргизүүгө кол койгон. Анда аялдардын эмгек чөйрөсүндөгү укуктарын жана мүмкүнчүлүктөрүн кеңейтүү, жумуш ордундагы асылуу жана зомбулуктун алдын алуу боюнча чаралар каралган.
Белгиленгендей, жолугушууда жабыр тарткан адамдарга көрсөтүлүүчү жардамдын жеткиликтүүлүгү жана сапаты, ошондой эле мамлекеттик органдар менен башка уюмдардын кызматташуусу боюнча сунуштар айтылды.
Улуттук изилдөө Азия өнүктүрүү банкынын техникалык колдоосу менен "COVID-19 пандемиясынан кийинки мезгилде Борбордук жана Батыш Азия өлкөлөрүндө гендердик зомбулукка каршы аракеттенүү механизмдерин күчөтүү" долбоорунун алкагында жүргүзүлүүдө.
Министрлик жыйындагы айтылган сунуштар изилдөөнү өркүндөтүүдө жана гендердик жана үй-бүлөлүк зомбулуктун алдын алуу боюнча улуттук саясатка сунуштамаларды даярдоодо эске алынарын белгиледи.
