Кыргызстанда 8 райондо суу кызматтарын көрсөтүүчү ишканалар түзүлөт
Чүйдүн Панфилов районунда ичүүчү суу менен камсыздоо жана саркынды сууларды чыгаруу кызматтарын көрсөтүүчү ишкана түзүү боюнча кеңешме өттү. Бул тууралуу Суу ресурстары, айыл чарба жана кайра иштетүү өнөр жайы министрлигинин басма сөз кызматы билдирди.
Кеңешмеге райондук мамлекеттик администрациянын, айыл өкмөттөрүнүн, айыл кеңештеринин, муниципалдык ишканалардын өкүлдөрү жана Ичүүчү суу менен камсыздоо жана саркынды сууларды чыгарууну өнүктүрүү департаментинин адистери катышты.
Маалыматка ылайык, ишкананын түзүлүшү Панфилов районунда ичүүчү суу менен камсыздоо кызматтарынын сапатын, ишенимдүүлүгүн жана туруктуулугун жогорулатууга багытталат.
Мындай райондук кызмат көрсөтүүчү адистештирилген муниципалдык ишканалар 8 райондо түзүлөт.
Белгиленгендей, бул долбоор Ош, Чүй жана Ысык-Көл облустарындагы 126 айылдык калктуу конушту коопсуз суу жана заманбап саркынды суу кызматтары менен камсыз кылууга багытталган. Жыйынтыгында 450 миңден ашуун тургунга таза ичүүчү суу жеткиликтүү болот.
