Бишкекте туризм боюнча кыргыз-кытай долбоорлору талкууланды
Бишкек шаарынын мэриясынын өкүлдөрү Кытайдын Нанкин шаарынан келген SOHO Culture Group Co., Ltd. компаниясынын делегациясы менен жолугушту.
Мэриянын маалыматына ылайык, жолугушууга мэриянын Дене тарбия жана спорт, туризм жана жаштар менен иштөө департаментинин директору Канатбек Маматов, анын орун басары Рустам Алишеров, департаменттин кызматкерлери жана SOHO Culture Group Co., Ltd. компаниясынын башкармалыгынын төрагасы Юэ Лян баштаган делегация катышты.
Тараптар туризм, спорт жана жаштар саясаты багыттарында кызматташуунун келечегин талкуулашты.
Өзгөчө көңүл Бишкектин туристтик потенциалын илгерилетүүгө, туристтик инфраструктураны өнүктүрүүгө жана эс алуу, көңүл ачуу тармагында биргелешкен долбоорлорду ишке ашырууга бурулду.
Жолугушуунун жыйынтыгында тараптар аталган багыттар боюнча кызматташтыкты улантууга жана биргелешкен долбоорлорду ишке ашырууга кызыкдар экенин билдиришти.
