Кыргызстан менен Корея статистика тармагындагы кызматташтыкты өрчүтөт
Жогорку Кеңештин депутаты Уланбек Жаанбаев Түштүк Кореянын Статистика министринин чакыруусу менен аталган өлкөгө иш сапары менен барды. Бул тууралуу парламенттин басма сөз кызматы билдирди.
Маалыматка ылайык, депутат статистика тармагындагы заманбап ыкмалар, маалымат базаларын башкаруу жана санариптештирүү боюнча Түштүк Кореянын тажрыйбасы менен таанышты.
Жолугушууларда статистикалык маалыматтарды системалаштыруу, аларды натыйжалуу пайдалануу жана мамлекеттик башкарууда так жана ишенимдүү маалыматтардын негизинде чечим кабыл алуу маселелери талкууланды.
Уланбек Жаанбаев Кыргызстандын Жогорку Кеңешинде жүргүзүлүп жаткан санариптештирүү иштери тууралуу маалымат берип, парламенттин маалыматтар менен иштөө сапатын жогорулатуу, аналитикалык мүмкүнчүлүктөрдү кеңейтүү багыттарына токтолду.
Заманбап технологияларды мамлекеттик башкарууга киргизүү боюнча тажрыйбаларды өлкөдө колдонуу мүмкүнчүлүктөрү орчундуу экени белгиленди.
