Жапониядан гранттык негизде онкологиялык жабдуу алуу боюнча сүйлөшүү жүрдү
Жогорку Кеңештин Жапония менен кызматташуу боюнча депутаттык достук тобунун башчысы Таалайбек Масабиров Жапониянын эл аралык кызматташтык агенттигинин Кыргызстандагы туруктуу өкүлү Нишигата Котаро менен жолугушту.
Парламенттин басма сөз кызматы билдиргендей, жолугушууга саламаттык сактоо министри Дамирбек Осмонов жана Улуттук онкология жана гематология борборунун директору Нурбек Букуев катышты.
Тараптар Кыргызстандын саламаттык сактоо системасына компьютердик томография менен айкалышкан позитрондук-эмиссиялык томографияны (ПЭТ-КТ) киргизүү жана өнүктүрүү маселелерин талкуулашты. Анда адистерди даярдоо жана тиешелүү техникалык камсыздоо маселелерине да көңүл бурулду.
Таалайбек Масабировдун айтымында, учурда ПЭТ-КТ жабдуусун гранттык негизде, башкача айтканда кайтарымсыз алуу боюнча сүйлөшүүлөр алгачкы баскычта турат.
Аталган жабдуу ооруларды эрте аныктоого жана бейтаптардын дарылануу үчүн чет өлкөгө чыгуусун азайтууга шарт түзөт.
Саламаттык сактоо министри Дамирбек Осмонов өлкөнүн мамлекеттик саламаттык сактоо системасында азырынча ПЭТ-КТ жабдуусу жок экенин белгилеп, бул жогорку технологиялуу ыкма онкологиялык ооруларга каршы күрөштө маанилүү экенин айтты.
