Депутат алты балалуу жаранга жеке эсебинен 10 тонна цемент берүүнү убада кылды
Жогорку Кеңештин депутаты Исманали Жороев Баткен облусунун Лейлек районундагы иш сапарынын алкагында 26-августта Тогуз-Булак айыл аймагына барды. Бул тууралуу парламенттин басма сөз кызматы билдирди.
Маалыматка ылайык, тургундар социалдык, экономикалык жана инфратүзүмдүк маселелерди көтөрүп, аларды чечүүгө көмөк көрсөтүүнү өтүнүштү.
Ошондой эле депутат Раззаков–Гордой–Кекире унаа жолунун жана Миң-Жылкы багытындагы жолдун абалы менен таанышты.
Мындан тышкары, Кара-Булак айылында алты баланы тарбиялап жаткан Айбашов Өмүрдүн үй-бүлөсүнө колдоо көрсөтүп, жеке каражатынын эсебинен 10 тонна цемент берүүнү убада кылды.
Эл өкүлү ар бир көтөрүлгөн маселени тиешелүү мамлекеттик органдарга жеткирип, чечүү жолдорун издөөгө аракет кыларын белгиледи.
