Кыргызстан менен Словения инвестициялык кызматташтыкты талкуулады
27-августта Инвестициялар боюнча улуттук агенттикте Словениянын RIKO компаниясынын өкүлдөрү менен жолугушуу болуп өттү. Бул тууралуу мекеменин басма сөз кызматы билдирди.
Маалыматка ылайык, жолугушууда словениялык тарапка Кыргызстандын инвестициялык мүмкүнчүлүгү, экономиканын артыкчылыктуу багыттары жана эл аралык өнөктөштүк үчүн келечектүү инвестициялык долбоорлор тууралуу маалымат берилди.
"Биз келечектүү демилгелерди ишке ашырууга жана узак мөөнөттүү өнөктөштүк үчүн зарыл шарттарды түзүүгө даярбыз", — деди улуттук агенттиктин башчысы Равшанбек Сабиров.
Тараптар жолугушуунун жүрүшүндө энергетика тармагындагы, ошондой эле экономиканын башка артыкчылыктуу багыттарындагы кызматташтыктын мүмкүнчүлүктөрүн талкуулашты.
RIKO компаниясынын өкүлдөрү Кыргызстанда иш алып баруу шарттарын жана өлкөдөгү келечектүү долбоорлорго катышуу мүмкүнчүлүктөрүн кеңири изилдөөгө кызыкдар экенин билдиришти.
Жыйынтыгында жаңы инвестициялык багыттарды аныктоо жана Кыргызстан менен Словениянын ортосундагы ишкердик байланыштарды кеңейтүү үчүн негиз түзүлгөнү белгиленди.
