Кыргызстан менен Кытай соода багытынан өндүрүштүк кызматташтыкка өтөт
Суу ресурстары, айыл чарба жана кайра иштетүү өнөр жайы министри Эрлист Акунбеков "Кыргызстан – Кытай: биргелешкен өнүгүү жана гүлдөп-өсүү жолунда" аталышындагы инвестициялык форумга катышып, сөз сүйлөдү.
Министрлер Кабинетинин басма сөз кызматы билдиргендей, министр эки өлкөнүн мамилеси жогорку деңгээлдеги ишенимге негизделип, учурда бир катар ири инвестициялык долбоорлор ишке ашырылып жатканын белгиледи.
Статистикалык маалыматтарга ылайык, 2021–2025-жылдары Кытайдан Кыргызстанга келген түз чет өлкөлүк инвестициялардын көлөмү болжол менен 1,85 млрд долларды түзгөн.
Форумда соодага негизделген моделден инвестициялык жана өндүрүштүк кызматташтыкка өтүү маселелери талкууланды. Анын ичинде өнөр жайды локалдаштыруу, энергетика жана жашыл экономика, айыл чарба жана кайра иштетүү, санариптештирүү жана инновация багыттарында жаңы долбоорлорго басым жасалды.
Ошондой эле "Кытай–Кыргызстан–Өзбекстан" темир жолунун курулушу кызматташтыктын жаңы баскычына көтөрүлүп, транспорттук-логистикалык байланыштарды кеңейтүүгө жана жаңы экономикалык мүмкүнчүлүктөрдү түзүүгө шарт түзөрү белгиленди.
Форумдун алкагында кыргызстандык жана кытайлык ишкерлердин ортосунда В2В форматындагы жолугушуулар уюштурулуп, бир катар документтерге кол коюлду.
Эрлист Акунбеков иш-чаранын жыйынтыгында жаңы бизнес-өнөктөштүктөр түзүлүп, алар жүзөгө ашырыларына ишеним билдирди.
