Жээнбек Кулубаев ШКУга мүчө өлкөлөрдүн улуттук координаторлорун кабыл алды
Тышкы иштер министри Жээнбек Кулубаев 28-августта Шанхай кызматташтык уюмуна мүчө мамлекеттердин улуттук координаторлору менен жолугушту. Бул тууралуу ТИМдин басма сөз кызматы билдирди.
Маалыматка ылайык, жолугушууга Улуттук координаторлор кеңешинин жыйынына катышуу үчүн Кыргызстанга келген өкүлдөр катышты.
Жээнбек Кулубаев Кыргызстандын ШКУга төрагалыгынын алкагында өтүп жаткан жыйындын маанисине токтолуп, алдыдагы мамлекет башчыларынын кеңешинин саммити уюмдун өнүгүүсүндө жана көп тараптуу кызматташтыкты чыңдоодо маанилүү баскыч болорун белгиледи.
Министр ошондой эле улуттук координаторлорго саммиттин мазмундук бөлүгүн даярдоого кошкон салымы жана кызматташтыгы үчүн ыраазычылык билдирди.
Жолугушуунун соңунда ШКУга мүчө мамлекеттердин улуттук координаторлорунун атынан Орусиянын президентинин ШКУ иштери боюнча атайын өкүлү Бахтиер Хакимов сөз сүйлөп, Кыргызстандын төрагалыгынын алкагындагы иштерге жогору баа берди.
