Кыргызстан менен Пакистан экстрадиция боюнча келишимге кол койду
Кыргызстан менен Пакистан кылмыш иштери боюнча эл аралык кызматташууга багытталган эки документке кол коюшту. Бул тууралуу Башкы прокуратурадан билдиришти.
Келишимдерге бүгүн Бишкекте Пакистандын Премьер-министри Мухаммад Шахбаз Шарифтин расмий сапарынын алкагында кол коюлду.
Алардын бири — Кыргызстан менен Пакистандын ортосунда адамдарды өткөрүп берүү (экстрадиция) жөнүндө келишим. Экинчи документ кылмыш-жаза иштери боюнча өз ара укуктук жардам көрсөтүүнү карайт.
Белгилей кетсек, 2025-жылы эки өлкө соттолгон адамдарды өткөрүп берүү жөнүндө макулдашууга кол коюп, кийин документ ратификацияланган.
Натыйжада Кыргызстан менен Пакистандын ортосунда кылмыш-жаза иштери боюнча кызматташуунун үч негизги багытын — экстрадицияны, өз ара укуктук жардам көрсөтүүнү жана соттолгон адамдарды өткөрүп берүүнү камтыган келишимдик-укуктук база түзүлдү.
