Кыргызстан менен Пакистандын лидерлери Ала-Арчадагы этномаданий программа менен таанышты
Президент Садыр Жапаров жана Пакистандын Премьер-министри Мухаммад Шахбаз Шариф бүгүн "Ала-Арча" мамлекеттик жаратылыш паркында улуттук каада-салттарга жана маданиятка арналган этномаданий программа менен таанышты.
Президенттик администрациядан билдиришкендей, делегация башчылары үчүн орто кылымдардагы көчмөндөр маданиятынын стилинде жасалгаланган "Кыргыз айылы" көргөзмө комплекси уюштурулду.
Конокторду добулбастардын коштоосунда төкмө акындар, зоот кийген баатырлар жана улуттук кийимчен кыздар тосуп алышты.
Пакистан делегациясына кыргыздын улуттук тамак-аштары жана кол өнөрчүлүк буюмдары көрсөтүлдү. Анын ичинде килем жана шырдак жасоо, боз үйдүн бөлүктөрүн даярдоо, кылыч жана айбалта жасоо өнөрү тааныштырылды.
Ошондой эле "Кайбар" элдик-фольклордук ансамбли Кыргызстандын жана Пакистандын элдеринин музыкалык чыгармаларын, дүйнөлүк классиканын үлгүлөрүн аткарды.
Меймандарга алгыр куштар жана тайгандар менен аңчылык кылуу өнөрү көрсөтүлүп, улуттук бийлер тартууланды.
