Депутаттар Кара-Балта спирт заводунун ишмердүүлүгү менен таанышышты
Жогорку Кеңештин депутаттары «Кара-Балта спирт заводу» мамлекеттик ишканасынын ишмердүүлүгү менен жеринде таанышышты. Бул тууралуу парламент кабарлады.
Көчмө жыйындын жүрүшүндө депутат Дастан Бекешев алкоголдук ичимдиктердин баасын арзандатуу, административдик жана башка чыгымдарды, өлкөнүн керектөөлөрү тууралуу маселелерди көтөрдү.
Ал эми эл өкүлү Султанбай Айжигитов өндүрүштүк кубаттуулукту жана суроо-талапты кеңейтүүгө токтолду. Буга ишкананын өкүлдөрү өндүрүштүк кубаттуулукту этап-этабы менен кеңейтүү пландалып жатканын айтып, алкоголдун наркына электр энергиясына, жаратылыш газына болгон тарифтер, чийки заттын баасы жана башка факторлор таасир этээрин кошумчалашты. Ошондой эле алкоголдук ичимдиктерди Россияга экспорттоо маселеси каралып жатканын белгилешти.
Муну менен катар депутат Айсаракан Абдибаева ишкананын ишин жандантуу жана киреше алуу маселесин тактады. Ишкананын директору Кара-Балта спирт заводунун өндүрүш процесси 7 жыл токтоп, 2022-жылдын сентябрь айында кайра жанданганын айтты.
