"Элдик Банк" жана АӨБ 13 млн долларлык айыл чарба долбоорун колдойт

Бүгүн "Элдик Банк" ААК Азия өнүктүрүү банкы (АӨБ) менен биргеликте "Кыргыз Республикасында айыл чарбасында климаттын өзгөрүүсүнө туруктуу кошумча нарк чынжырларын өнүктүрүү" долбоорун ишке ашырууну баштады. Бул тууралуу "Кабар" улуттук маалымат агенттиги жазды.

Долбоорду каржылоо боюнча макулдашууга "Элдик Банктын" Төрагасы Уланбек Ногаев жана АӨБнин Кыргыз Республикасындагы туруктуу өкүлчүлүгүнүн директору Чжэн Ву кол коюшту.

Долбоор алкагында 13 миллион АКШ долларына барабар субсидияланган кредит улуттук валютада берилет. Анын ичинен:

5 млн АКШ долларына чейин – мөмө-жемиш өндүрүүчүлөр жана жеке ишкерлер үчүн;

Мөөнөтү – 10 жыл;

Пайыздык чен – жылдык 6%.

Каражаттар жыйноо, сактоо, кайра иштетүү жана сатуу, айыл чарба жабдууларын сатып алуу, логистика жана имараттарды реконструкциялоо үчүн колдонулат. Долбоор дыйкандарга жана чакан ишкерлерге өндүрүштү көбөйтүү, сапатты жакшыртуу жана заманбап технологияларды киргизүү мүмкүнчүлүгүн берет.

"Бул долбоор аркылуу дыйкандар жана кайра иштетүүчүлөр туруктуу колдоого ээ болуп, продукциянын көлөмүн жана сапатын жогорулатууга мүмкүнчүлүк алышат", – деди Уланбек Ногаев. АӨБ өкүлү Чжэн Ву долбоор климаттык туруктуулукту чыңдоого жана айыл жергесиндеги жашоо шарттарын жакшыртууга өбөлгө түзөрүн белгиледи.

Долбоордун негизги максаты – өндүрүштөн жеткирүүгө чейинки чынжырларды чыңдоо жана заманбап технологияларды колдонуу менен айыл чарбасын өнүктүрүү, ошондой эле өлкөдө азык-түлүк коопсуздугун камсыз кылуу.