Аравандык ишкер 5 сотых жерден жылына 2-3 миң банка лимон ширесин өндүрүп жатат
Араван районунда лимонду кайра иштетүүчү фабрика ишке кирип, анда лимондун ширеси гана эмес, анын кабыгынан да заманбап жабдуулар менен варенье өндүрүлүп жатат. Бул технология фермерлердин арасында жайылып жатканын Суу ресурстары, айыл чарба жана кайра иштетүү өнөр жайы министрлигинин басма сөз кызматы билдирди.
Райондо тропикалык өсүмдүктөрдү өстүргөн фермерлерди колдогон консультациялык борбор түзүлгөн. Алардын бири — Миркамил Касымов, аянты 5 сотых күнөскананын ээси. Күнөсканада 30 лимон дарагы, мандариндер, банандар жана папайя өсөт.
Лимон дарактары сегиз жылдан бери түшүм берип, жыл сайын түшүмдүүлүгү жогорулап келе жатат. Фермердин айтымында, лимон 100 жылга чейин мөмө бере алат, татаал каражат талап кылбайт жана өтө кирешелүү өсүмдүк болуп эсептелет.
Кышында күнөскананын температурасы 10–15 градус деңгээлде сакталат. Жайкысын ал салкын болушу үчүн жарым-жартылай атайын тор менен жабылат.
Бир лимон бадалы жылына 100 килограммга чейин түшүм бере алат. Аталган чарбада лимондун баасы — 250 сом, ал эми базарда 300–350 сом. 1 килограмм лимондон 370 грамм таза сапаттуу шире чыгат.
Миркамил Касымов "Бир айыл — бир продукт" программасы менен кызматташып, жылына 2–3 миң банка лимон ширесин чыгарат. Быйыл жаңы өндүрүш ишке кирип, үч түрдөгү кайра иштетилген продукция чыгарылган. Жакын арада "бал менен лимон" аттуу жаңы линия да сатыкка чыгат. Ошол убакта он жергиликтүү аялды жумушка алынат.
