Нарында ишкерлерди колдоо боюнча ЧОИ-2030 программасы талкууланды
Нарын шаарында Кыргыз Республикасынын 2030-жылга чейинки чакан жана орто ишкердикти колдоо жана өнүктүрүү программасынын (ЧОИ-2030) долбоорун талкуулоого арналган көчмө эксперттик жолугушуу болуп өттү. Бул тууралуу Экономика министрлигинен билдиришти.
Иш-чара Экономика жана коммерция министрлиги тарабынан Бириккен Улуттар Уюмунун Өнүктүрүү программасы жана ЕККУнун эксперттеринин колдоосу менен уюштурулду.
Жолугушууга Нарын облусунун бизнес-коомчулугунун, тармактык ассоциациялардын жана жергиликтүү бийлик органдарынын өкүлдөрү катышты. Ишкерлер аймакта бизнести өнүктүрүүдөгү негизги тоскоолдуктарды, каржылоого жетүү көйгөйлөрүн жана колдоого муктаж багыттарды белгилешти.
Талкуунун жүрүшүндө жеңилдетилген насыялоонун инструменттерин кеңейтүү, ишкерлерди колдоо үчүн санариптик инфраструктураны өнүктүрүү, ошондой эле жол-жоболорду жөнөкөйлөтүү маселелерине өзгөчө көңүл бурулду. Мындан тышкары, "бир терезе" принциби менен иштей турган регионалдык санариптик хаб түзүү, экспорттук жана өндүрүштүк кластерлерди, анын ичинде айыл чарба продукциясын кайра иштетүү жана тигүү тармагын өнүктүрүү боюнча сунуштар айтылды.
Жыйынтыгында Нарын облусунун ишкерлеринен түшкөн сунуштар ЧОИ-2030 программасынын долбоорун иштеп чыгууда жалпыланып, эске алынары белгиленди.
