Баткенде жеке ишкерлердин 30%дан ашыгын аялдар түзөт
Баткен облусунда жеке ишкерлердин 30%дан ашыгын аялдар түзөт. Бул тууралуу Президенттин Баткен облусундагы ыйгарым укуктуу өкүлү Мамыржан Рахимов Улуу Британиянын Кыргызстандагы элчиси Николас Боулер жана Швейцариянын Кыргызстандагы элчиси Сирокко Мессерли менен жолугушууда билдирди.
Өкүлчүлүктөн маалымдашкандай, жолугушууда аймактагы миграция маселелери, аялдар менен жаштардын мүмкүнчүлүктөрүн кеңейтүү, жергиликтүү ишкердикти колдоо, саламаттык сактоо, климаттык туруктуулук жана социалдык долбоорлор талкууланды.
Мамыржан Рахимов өз сөзүндө Швейцария жана Улуу Британия тарабынан каржыланып жаткан долбоорлор чакан бизнеске, эмгек мигранттарына жана жаш ишкерлерге олуттуу колдоо көрсөтүп жатканын белгиледи.
Анын айтымында, жарандардын ишкердик демилгелерин колдоо максатында ар кандай гранттык программалар, окутуу долбоорлору жана жеңилдетилген насыялар ишке ашырылууда.
Тараптар кызматташууну мындан ары да кеңейтүү зарылдыгын белгилеп, калктын жашоо-шартын жакшыртуу жана Баткен облусунун туруктуу өнүгүүсүн камсыз кылуу негизги максат экенин айтышты.
Белгилей кетсек, Эл аралык миграция уюмунун "Борбор Азиядан Улуу Британияга сезондук жумушчулар үчүн коопсуз миграция" долбоорунун алкагында Баткен облусунда пилоттук 1+1 программасы ишке ашырылууда. Бул программа бизнес баштоо жана кеңейтүү демилгелерин колдоого багытталган. Акыркы эки жыл ичинде миграциядан кайтып келген 28 жаранга грант берилген.
