Салык кызматынын төрагасы Баткенде ишкерлердин көйгөйлөрүн укту
Мамлекеттик салык кызматынын төрагасы Алмамбет Шыкмаматов 16-мартта жумушчу сапары менен Баткен облусуна барды. Бул тууралуу салык кызматынан билдиришти.
Сапардын алкагында ал аймактык салык органдарынын ишмердүүлүгү менен таанышып, кызматкерлердин иштөө шарттарын көрүп чыкты. Ошондой эле салыктык башкаруунун натыйжалуулугун жогорулатуу жана салык төлөөчүлөргө көрсөтүлүүчү кызматтын сапатын жакшыртуу маселелери талкууланды.
Иш сапарынын жүрүшүндө Шыкмаматов аймактагы салык төлөөчүлөр менен жолугушуп, ишкерлерге "Салык күзөт" автоматташтырылган аналитикалык системасы тууралуу маалымат берди. Бул система салыктык башкаруунун ачык-айкындуулугун жогорулатууга жана мыйзам бузуулардын алдын алууга багытталган. Ошондой эле жолугушууда салык мыйзамдарындагы акыркы өзгөртүүлөр тууралуу түшүндүрмөлөр берилди.
Жолугушуу ачык диалог форматында өтүп, ишкерлер өздөрүн кызыктырган суроолорду берип, көйгөйлөрүн көтөрүштү. Салык кызматынын төрагасы кайрылууларды угуп, зарыл түшүндүрмөлөрдү берип, айрым маселелерди чечүүнүн мүмкүн болгон жолдорун сунуштады.
Алмамбет Шыкмаматов Баткен облусунда ишкердикти колдоого жана аймакка инвестиция тартууга багытталган бир катар салыктык жеңилдиктер жана преференциялар каралганын белгиледи.
Мындан тышкары, сапардын алкагында көмүр өнөр жайынын өкүлдөрү менен өзүнчө кеңешме өткөрүлүп, тармактын учурдагы абалы жана салыктык башкарууга байланышкан маселелер талкууланды. Төрага сунуштарды угуп, көйгөйлөрдү биргеликте чечүү зарылдыгын белгиледи.
