Кыргызстанда миңден ашык кыргыз-корей компаниялары иштейт - экономика министри
Бишкекте жеңил өнөр жай тармагындагы биринчи кыргыз-корей бизнес-форуму башталды. Бул тууралуу Экономика министрлигинин басма сөз кызматы билдирди.
Экономика министри Данияр Амангелдиев Түштүк Кореянын Кыргызстандагы элчиси Ли Вонджэ мырза, Кореянын өкүлдөрү жана эки өлкөнүн бизнес чөйрөлөрүнүн өкүлдөрү менен саламдашып, стратегиялык өнөктөштүктү жана эки тараптуу кызматташууну мындан ары да өнүктүрүү – Кыргыз Республикасы үчүн өтө маанилүү экенин белгиледи.
Ошондой эле ал Кыргызстанда жагымдуу инвестициялык климатты түзүү боюнча аракеттер көрүлүп жатканын белгиледи. Учурда республикада кореялыктар катышкан 1000ден ашык компания иштейт.
Кошумчалай кетсек, 2021-жылдын январында Корея өкмөтүнүн чечими менен Кыргызстан өнүктүрүүгө расмий жардам көрсөтүү боюнча Түштүк Кореянын башкы өнөктөш өлкөлөрүнүн тизмесине киргизилген.
Кыргызстан Кореяны дүйнөдөгү эң өнүккөн экономикасы бар үлгү катары карайт жана экономиканын, өнөр жайдын бардык тармактарына жаңы технологияларды киргизүү боюнча Кореянын алдыңкы тажрыйбасын жана практикалык көндүмдөрүн үйрөнүүгө даяр, деп кошумчалады министр.
