Өзбекстанда кыргыз капиталынын катышуусунда 291 ишкана бар
Бүгүнкү күндө Өзбекстанда кыргыз капиталынын катышуусунда 291 ишкана ишмердүүлүгүн жүргүзүп келет жана Өзбекстан дагы КР менен көп тармакта кызматташууга кызыкдар. Бул тууралуу Өзбекстандын Инвестиция жана тышкы соода министрлигинин билдирүүсүндө айтылат.
Ал эми 12-октябрда Өзбекстандын Инвестиция жана тышкы соода министри Жамшид Ходжаев Кыргызстандын элчиси Муса Жаманбаев менен жолугушуп, анда кыргыз-өзбек кызматташуусунун келечегин талкуулашкан.
“Маалым болгондой, Өзбекстанда бүгүнкү күндө кыргыз капиталынын катышуусунда 291 ишкана иштейт. Тараптар эки өлкөнүн аймактарында даяр текстиль, фармацевтика, курулуш жана айыл чарба продукцияларын өндүрүү боюнча биргелешкен долбоорлордун санын көбөйтүүгө даяр экендиктерин билдиришти.
2022-2025-жылдарга соода-экономикалык кызматташтык жана өнөр жай кооперациясын өнүктүрүү программасы, ошондой эле айыл чарба техникаларын жана автоунааларды чыгарууну уюштуруу, дары-дармектерди жүгүртүү чөйрөсүндө кызматташуу жөнүндө макулдашуу иштелип жатат”, – дейт министрлик.
Ошондой эле жолугушууда тараптар 1 млн 850 миң доллар өлчөмүндө шаардык транспорт тармагындагы долбоорду каржылоону баштаган өзбек-кыргыз өнүктүрүү фондунун ишмердүүлүгүн талкуулашты.
Өзбекстандын министрлиги жип ийрүүчү ишкана түзүү долбоорун каржылоону иштеп чыгуу жана фондду тартуу менен Кыргызстанда травертинди кайра иштетүү долбоорун биргелешип ишке ашыруу боюнча макулдашуу болгонун белгиледи.
Тараптар ошондой эле өнөр жай кооперациясынын жаңы келечектүү биргелешкен долбоорлорун иштеп чыгуу, соода келишимдерин түзүү, эки тараптуу кызматташуу боюнча өкмөттөр аралык комиссиянын 10-отурумун жана Бишкекте мамлекет башчыларынын катышуусунда бизнес-форум өткөрүү үчүн Өзбекстандын өкмөттүк делегациясынын сапарын уюштурууну талкуулашты.
