Эл аралык Moody’s рейтинг агенттиги 2022-жылдагы КРнын ИДПсынын динамикасына берген баасын кайра карап чыгып, мурда күтүлгөн 1% төмөндөөдөн 3%га өскөнүн белгиледи. Бирок ошол эле учурда узак мөөнөттүү келечекте Кыргызстандын рейтинги боюнча божомолду “терс” кылып өзгөрттү.

Белгилей кетсек, акыркы маалыматтарга ылайык, Moody’s агенттигинде Кыргызстандын кредиттик рейтинги B3 көрсөткүчүндө турат, бул инвесторлор үчүн жогорку кредиттик тобокелдиктер бар дегенди түшүндүрөт.

Быйыл жазында агенттик Россиядагы кескин жана узакка созулган экономикалык төмөндөөлөр Кыргызстандын өнүгүшүнүн узак мөөнөттүү алсырашына алып келет, мигранттардын акча которууларынын кыскарышы жана финансылык туруктуулукка жасалган басым ага өбөлгө болуп кетет деп болжолдогон болчу.

Бирок Кыргызстан Украинадагы окуялардын экономикалык кесепеттерине туруктуулугун көрсөттү. Бул мигранттардын акча которууларынын туруктуу агымы жана кеңири ички суроо-талап менен камсыздалды.

Мындан тышкары, акыркы мезгилдеги тике чет өлкөлүк жана транспорт секторуна инвестициялардын туруктуу агымы, ошондой эле алтын секторуна инвестициялардын потенциалынын жогорулашы, тышкы инвестициялардын болжолу күтүлгөндөн жакшыраак өнүгүп жатканын көрсөтүүдө.

«Ошентсе да Россия менен Украинанын ортосунда уланып жаткан аскердик чыр-чатактын белгисиз убакытка созулушуна байланышкан терс тобокелдиктер, Россиядагы экономикалык кырдаалдын Кыргызстан үчүн узак мөөнөттүү кесепеттери олуттуу бойдон калууда, бул терс божомолдорду берет», – деп билдирди Moody’s өзүнүн талдоосунда.

Терс божомолдорду эске алганда, Кыргызстандын рейтингинин жогорулашы күмөн. Эгерде Moody’s орус-украин согушунун терс таасири экономиканын кыска мөөнөттүү туруктуулугун бузуп, бюджеттин аткарылышынын жана тышкы төлөмдөрдүн абалынын узак мөөнөткө начарлашына алып келет деген тыянакка келсе, Кыргызстандын рейтинги төмөндөшү мүмкүн.