Финансы министрлиги чакан жана орто бизнести колдоо максатында 10 коммерциялык банкка 280 млн сом которду. Бул тууралуу министрликтин маалымат кызматы билдирди.

Каражаттар пандемиядан кийинки кризистен чыгууда микро, кичи жана орто ишканаларды колдоо үчүн “Өзгөчө кырдаалдарда жеке жана финансы секторун колдоо” долбоорунун алкагында которулган.

Кредиттик жана гранттык каражаттар Дүйнөлүк банк жана Азия инфраструктуралык инвестиция банкы тарабынан бөлүнгөн. Долбоордун суммасы 72 млн доллар же 6 млрд сомду түзөт. Финансы министрлиги каржылоонун көлөмүн дагы 50 млн долларга көбөйтүү боюнча макулдашууга ниеттенүүдө.

Долбоор айыл чарбасынан башка ишкердикти колдойт жана каржылайт. Каржылык жардам сом менен, пайызсыз кайтаруу шартында берилет.

Долбоордун катышуучулары салык жана камсыздандыруу төгүмдөрү боюнча карыздын жоктугу жөнүндө маалымат бериши керек, ошондой эле эки категорияга бөлүнгөн төмөнкү критерийлерге жооп бериши керек:

• жылдык жүгүртүүсү 8 млн сомдон ашпаган жеке ишкерлер. Алар 18 айга чейин 250 миң сомго чейин жардам ала алышат
• жылдык жүгүртүүсү 30 млн сомдон ашпаган жеке ишкерлер жана юридикалык жактар. Аларга 18 айга чейин 1 млн сомго чейин жардам көрсөтүлөт.

Коммерциялык банктардын ичинен тандоо жүргүзүлүп, төмөндөгү банктар менен келишимдер түзүлдү:

• «Айыл Банк»
• «РСК банк»
• «Керемет Банк»
• «Доскредобанк»
• «Халык Банк Кыргызстан»  
• «ФинансКредитБанк»
• «Банк Азии»
• «Коммерческий банк Кыргызстан»
• «Кыргызкоммерцбанк»
• «Бакай банк»
• «Капитал банк».