Кыргызстан менен Өзбекстан соода мамилелерин бекемдейт – Экономика министрлиги
2023-жылдын 11-октябрында, Ташкентте КРнын Өзбекстандагы соода өкүлчүлүгү жана Өзбекстандын Соода – өнөр жай палатасынын өкүлдөрүнүн жолугушуусу болуп өттү. Бул тууралуу Экономика жана коммерция министрлиги билдирди.
Бул жолугушуу эки өлкөнүн ортосундагы соода-экономикалык байланыштарды талкуулоого жана бекемдөөгө жакшы мүмкүнчүлүк болду.
Жолугушуунун башкы максаты КР менен Өзбекстан Республикасынын ортосундагы өз ара сооданы кеңейтүү жана тажрыйба алмашуу келечегин талкуулоо болду. Тараптар өз ара ишенимге жана кызматташтыкка негизделген достук жана өз ара пайдалуу мамилелерди активдүү өнүктүрүүгө даярдыгын баса белгилешти. Жолугушуунун жыйынтыгында тараптар соода байланыштарын мындан ары өнүктүрүү жана бекемдөө үчүн бардык зарыл чараларды көрүүгө чечкиндүүлүгүн ырасташты.
Жолугушуунун жүрүшүндө тараптар Өзбекстандын аймагында Кыргыз товар өндүрүүчүлөрүнүн тамак-аш көргөзмөсүн уюштурууну жана өткөрүүнү алдын ала талкуулашты.
Тараптар жергиликтүү тамак-аш азыктарын жана суусундуктарды сунуштоо жана жайылтуу үчүн жагымдуу платформа түзүүгө жалпы кызыгуусун жана чечкиндүүлүгүн билдиришти. Бул көргөзмө ишканаларга жана компанияларга өз продукцияларын көрсөтүүгө, жаңы бизнес байланыштарын түзүүгө жана таасир чөйрөсүн кеңейтүүгө мүмкүндүк берет.
Соода өкүлчүлүгү Соода-өнөр жай палатасына жолугушуу үчүн ыраазычылык билдирип, келечекте натыйжалуу жана жемиштүү кызматташууну улантууга үмүттөнөрүн билдирди.
