Талас облусунун Манас районундагы ташты кайра иштетүүчү завод модернизацияланат. 20 млн сом өлчөмүндө каржылоо «Альянс Алтын» ишканасы тарабынан ушул эле аталыштагы өнүктүрүү фонду аркылуу берилген. Бул тууралуу компаниянын басма сөз кызматы билдирди.

Компаниядан белгилешкендей, каражат кичи жана орто бизнести колдоо программасынын алкагында кайтарымдуулук негизде бөлүнгөн. Завод өндүрүштүк жабдууларды сатып алып, цехти оңдоп, гранит блокторун иштетүү көлөмүн көбөйтөт. Өндүрүш Манас районунун Чоң-Капка айылында жайгашкан, чийки зат Арал айылындагы жергиликтүү карьерден алынат.

"Бүгүнкү күндө ишкана 15тен ашык адамды иш менен камсыз кылууда. Жаңыланган жабдууларды ишке киргизүү менен жумуштуулуктун көбөйүшү жана өндүрүштүк кубаттуулуктун кеңейиши күтүлүүдө. Бул аймак үчүн жаңы экономикалык мүмкүнчүлүктөрдү түзүп, өндүрүш инфраструктурасын өнүктүрүүгө өбөлгө түзөт", — деп айтылат маалыматта.

«Альянс Алтын» мындан ары да Талас облусунун туруктуу өнүгүшүнө салым кошкон демилгелерди колдоо ниетин билдирет. Приоритеттерге жергиликтүү экономиканы чыңдоо жана айыл жеринде жашоонун сапатын жогорулатуу кирет.