Кыргызстан спирти Россияда сапаттуу деп табылды
Мамлекеттик мүлктү башкаруу боюнча мамлекеттик агенттиги кыргыз спирти Москва жана Минскте өткөн эл аралык конкурстарда сыйлыктарга татыктуу болгонун билдирди.
Агенттиктен билдиргендей, москвалык “Эң мыкты спирт” эл аралык конкурсунун жыйынтыгы боюнча Кыргызстанда өндүрүлгөн этил спирти дүйнөлүк сапат стандартына жооп берип эки күмүш медалга татыктуу болгон. Ошондой эле Минскидеги эл аралык алкоголдук жана алкоголдук эмес “Залаты келiх” конкурсунда кыргыз псирти люкс классындагы мыкты спирт деп аныкталып, алтын медалга татыган.
Эске салсак, “Кара-Балта спирт заводу” көп мезгил иштебей туруп 2020-жылы кайра жанданган. 5 жыл ичинде ишкананын продукциясынын сапатын, кызматкерлердин иштөө шарттарын жана киреше табуу жагын жакшыртуу боюнча бир топ иштер жасалган.
Этил спиртин өндүрүүгө жана реализациялоого мамлекетик монополия киргизилген соң алкоголдук продукцияларды өндүрүүчүлөр тарабынан төлөнүүчү акциздик салык өскөн. 2021-жылы 1,2 млрд сом болсо, 2022-жылы ал 2,05 миллиардга, а 2024-жылы 4,29 млрд сомго жеткен.
