Касымалиев: "Kyrgyz EXPO 2025" эл аралык экономикалык байланыштарды чыңдайт
Министрлер Кабинетинин Төрагасы Адылбек Касымалиев "Kyrgyz EXPO 2025" эл аралык көргөзмөсүнүн салтанаттуу ачылышына катышты. Ал көргөзмөнү өнөктөштүк мамилелерди бекемдөө, биргелешкен долбоорлорду ишке ашыруу жана алдыңкы тажрыйба алмашуу үчүн натыйжалуу платформа деп баалады. Бул тууралуу Өкмөттүн маалымат кызматынан билдиришти.
"Экономикадагы абал туруктуу жакшырууда. Биз өнөр жайды активдүү жандандырып, чакан жана орто бизнести өнүктүрүүгө өзгөчө көңүл буруудабыз. Ички дүң продуктунун жогорку өсүү темпи Кыргызстанды импорттоочу да, экспорттоочу да катары ишенимдүү өнөктөш катары кароого мүмкүндүк берет. Бюрократияны жоюунун, мамлекеттик кызматтарды санариптештирүүнүн жана логистикалык инфраструктураны өнүктүрүүнүн аркасында өлкөдө ачык-айкын жана туруктуу ишкердик чөйрө түзүлүп, анда ишкер мамлекеттин толук кандуу өнөктөшү болуп калат», — деп белгиледи Адылбек Касымалиев.
Ал ошондой эле "100 өнөр жай ишканасы – 2025" программасынын алкагында бүгүнкү күндө 77 ишкана ишке киргенин кошумчалады.
МинКаб Төрагасы "Kyrgyz EXPO" сыяктуу иш-чаралар жаңы өнөктөштүктөрдү түзүүгө, эл аралык байланышты чыңдоого жана Кыргызстандын дүйнөлүк аренадагы мүмкүнчүлүктөрүн илгерилетүүгө өбөлгө түзөрүн белгиледи. Ал катышуучуларга жемиштүү сүйлөшүүлөрдү жана өз ара пайдалуу келишимдерди түзүүнү каалады.
