Сокулук районунда 116,2 млн сом финансылык бузуулар аныкталды
Эсептөө палатасынын 2025-жылга карата иш планынын алкагында Чүй облусунун Сокулук районундагы жергиликтүү өз алдынча башкаруу органдарынын жана бир катар мекемелердин 2024-жыл үчүн бюджеттеринин түзүлүшү жана аткарылышы боюнча шайкештик аудиттер жүргүзүлдү. Текшерүүнүн жыйынтыгында жалпы 116,2 млн сом өлчөмүндө финансылык бузуулар жана кемчиликтер аныкталды. Бул тууралуу Эсептөө палатасынын маалымат кызматынан билдиришти.
Алардын ичинен 94,7 млн сом калыбына келтирүүгө тийиш болгон, аудит маалында анын 65,1 млн сомукалыбына келтирилди.
Аныкталган бузуулардын негизгилери:
- бюджет долбоорунун киреше бөлүгүндөгү мыйзам бузуу — 13,1 млн сом;
- бюджетке милдеттүү төлөмдөрдү өз убагында чегербөө — 1,02 млн сом;
- бюджеттик каражаттарды сметадан тышкары пайдалануу — 810 миң сом;
- резервдик фондду максатсыз колдонуу — 104 миң сом;
- курулуш иштеринин наркын же көлөмүн негизсиз жогорулатуу — 3,5 млн сом;
- мурун эсепке алынбай келген мамлекеттик жана муниципалдык мүлк — 83,3 млн сом;
- эмгек акы жана башка төлөмдөр боюнча ашыкча чыгымдар — 1,9 млн сом;
- дебитордук карыздарды туура эмес эсепке алуу — 2,8 млн сом.
Аудиттин жыйынтыктары Эсептөө палатасынын аймактык бөлүмүнүн Коллегиясында каралып, тиешелүү отчет Президентинин Чүй облусундагы ыйгарым укуктуу өкүлүнө жана Сокулук райондук мамлекеттик администрациясына жиберилди.
Сокулук райондук администрациясына жана жергиликтүү өз алдынча башкаруу органдарына бузууларды жоюу боюнча жазма буйруктар жөнөтүлдү.
