Өзбекстан быйыл 9 айда 10 млрд долларга жакын алтын экспорттогон
Өзбекстан быйылкы жылдын 9 айында монетардык эмес алтындын экспорту боюнча олуттуу өсүшкө жетишкенин Улуттук статистика комитети кабарлады.
Маалыматка ылайык, 10 ай ичинде чет элге сатылган алтындын көлөмү 9,90 млрд долларды түзүп, 2024-жылдагы ушул мезгилге салыштырмалуу 49,4%га көп болгон (2024-жылы — 6,63 млрд доллар).
Алтындын өлкө экспортуна карата үлүшү 34,1%га жетип, өткөн жылдын январь–октябрына караганда (29,2%) кыйла жогорулаган. Бул баалуу металлдын Өзбекстандын тышкы соодасындагы мааниси өсүп жатканын көрсөтөт.
Эскерте кетсек, 2025-жылдын январь–октябрында өлкөнүн тышкы соода жүгүртүүсү 66,5 млрд долларды түзүп, өткөн жылдын ушул мезгилине салыштырмалуу 11,75 млрд долларга же 21,5%га көбөйгөн.
