Тоң районунда күнөскана менен көчөт жана үрөн сактоочу кампа ачылды
Токой кызматынын Тоң токой чарбасында заманбап күнөскана менен көчөт жана үрөн сактоочу муздаткыч кампасынын ачылышы болду.
Бул объектилер Түрк мамлекетинин Өкмөтүнүн каржылык колдоосунун жана БУУнун азык-түлүктүк жана айыл чарба уюмунун Friends долбоорунун алкагында курулуп жатат. Күнөсканага 2 млн 150 миң 118 сом, ал эми муздаткыч кампага 1 млн 304 миң 240 сом сарпталган.
Ошондой эле Тоң токой чарбасынын көчөт сатуу жана башка кызмат көрсөтүүлөрдөн топтолгон өздүк каражатынын эсебинен чарбанын кеңсеси 1 млн 915 миң 168 сомго капиталдык оңдоодон өткөрүлүп, бүткөрүлдү.
Президент С.Жапаровдун демилгеси менен ишке ашырылып жаткан "Жашыл мурас" кампаниясынын алкагында Тоң токой чарбасынын Кара-Кемер участогуна 30 гектар аянтка 37 500 түп ийне жалбырактуу бак-дарактардын көчөттөрү отургузулду. Аталган аянт жогоруда белгилеп кеткен Түркия мамлекетинин каржылык колдоосу жана БУУнун азык-түлүктүк жана айыл чарба уюмунун техникалык колдоосу менен тосмолонуп, токой отургузуу иш чарасы 3 млн 099 миң 586 сомго каржыланды.
