Шахимардан сугат системасын реконструкциялоо 11-декабрда башталат
Кадамжай районундагы Мухтар Нургазиев атындагы магистралдык каналдын башкы суу алуу түйүнүндө 11-декабрда "убакыт капсуласын" салуу аземи өтөрүн Айыл чарба министрлиги билдирди.
Маалыматка караганда, бул долбоор региондун айыл чарбасын өнүктүрүү үчүн стратегиялык мааниге ээ болгон Шахимардан ирригациялык системасын модернизациялоо долбоорунун башталышын туюндурат.
Аземге вице-премьер-министр — суу ресурстары, айыл чарба жана кайра иштетүү өнөр жайы министри Бакыт Торобаев, министрдин орун басары — суу ресурстары кызматынын директору Алмаз Жееналиев, президенттин Баткен облусундагы ыйгарым укуктуу өкүлү Айбек Шаменов, Дүйнөлүк банктын Кыргызстандагы өкүлү Хью Ридделл, долбоор жетекчиси Уланбек Төрөгелдиев, ошондой эле облустук жана райондук суу чарба кызматтарынын, подрядчы жана консалтинг уюмдарынын жетекчилери катышат.
Системаны жаңылоого 425,5 млн сом каралган. Курулуш иштери Кадамжай районунун эки айыл аймагын жана бир шаарды камтыйт. Жалпы узундугу 35,2 км болгон каналдын 25,67 километри толук реконструкцияланат.
