УКМК массалык экономикалык аткезчиликке катышкандарды камакка алды

УКМК Ош облусунда Өзбекстан Республикасынын 15 жаранынан жана КРнын 10 жаранынан турган трансулуттук кылмыштуу топтун ишин токтотту. УКМКнын басма сөз кызматынан маалымдагандай, алардын коргоочусу болгон КРнын Мамлекеттик бажы кызматынын эки кызматкерин, УКМКнын Мамлекеттик чек ара кызматынын бир аскери да кармалды.

Бул кылмыштуу топ Түркия Республикасынан кымбат баалуу дары-дармектерди жана зер буюмдарды Ош облусунда сатуу жана андан кийин Өзбекстан Республикасына аткезчилик жол менен алып өтүү үчүн системалуу түрдө КРна алып кирип тургандыгы аныкталган.

Билдирүүгө караганда, Стамбул-Ош каттамынын жүргүнчүлөрүнүн багажын текшерүү учурунда, УКМК Ош облусу боюнча Мамлекеттик чек ара кызматынын башкармалыгы жана Мамлекеттик бажы кызматынын Ош бажы башкармалыгы менен биргеликте Өзбекстан Республикасынын жана КРнын айрым жарандарынын колунда дары-дармектердин жана зер буюмдардын ири партиясы табылган. Экономикалык аткезчилик боюнча козголгон кылмыш иши боюнча жүргүзүлгөн тергөө жана оперативдик иш-чаралардын натыйжасында, кылмыштуу топтун уюштуруучулары жана активдүү мүчөлөрү кармалды. Алар: Өзбекстан Республикасынын үч жараны («У.Б.К.», «И.М.Т.» жана «С.У.А.») жана КРнын беш жараны («И.З.М.», «М.Б.П.», «М.У.К.», «К.Ш.Х.» жана «С.Б.К.») УКМКнын тергөө изоляторуна камакка алынышты.

Ошондой эле, бул кылмыштуу топ 2025-жылы Түркиядан 50дөн ашык каттамдарды жасап, 50 кг ашык алтынды аткезчилик жол менен алып өткөнү аныкталган. Бул аракеттер жалпысынан мамлекеттик бюджетке олуттуу зыян келтирген.

Учурда бул топтун кылмыштуу ишмердүүлүгүнө катышкан башка кызмат адамдарын аныктоо, ошондой эле мамлекетке келтирилген зыянды аныктоо жана кийин күнөөлүүлөрдүн баарын жоопкерчиликке тартуу боюнча тергөө жана оперативдик иш-чаралар жүрүп жатат.