Ак-Талаа районунда сүттү кайра иштетүүчү ишкана ачылды
Нарын облусунун Ак-Талаа районундагы Кара-Бүргөн айылында сүттү кайра иштетүүчү жаңы ишкана ишке берилди. Ишкананын негизги максаты — айыл тургундарынын уйларынан алынган сүттү сатып алып, сапаттуу сүт азыктарын өндүрүү.
Долбоор облустук өнүктүрүү фондунун колдоосу менен ишке ашырылып, курулушка жалпы 30 млн сом каражат жумшалган. Ишкана суткасына 1000 литрге чейин сүттү кайра иштетүү мүмкүнчүлүгүнө ээ. Учурда 6 адамды туруктуу жумуш оруну менен камсыз кылды.
Жаңы ишкананын ачылышы айыл чарба продукциясын жеринде кайра иштетүүнү өнүктүрүп, жергиликтүү калктын кирешесин көбөйтүүгө жана айыл тургундарынын социалдык-экономикалык абалын жакшыртууга олуттуу салым кошот.
Ишкана өндүргөн сүт азыктары ички рынокко багытталып, сапат жана коопсуздук талаптарына ылайык чыгарылат.
