"Макмал" алтын кени быйыл 670 млн таза кирешеге чыкты
Кумтөр алтын кенинен быйылкы жылы мамлекет 678 млн доллар таза киреше көргөнүн президент Садыр Жапаров Бишкекте өтүп жаткан IV Элдик курултайда билдирди.
Анын айтымында, акыркы үч жылда Кумтөрдөн 2 млрд доллар таза киреше түшкөн.
"Кумтөр кенин мамлекетке алганыбыздан бери көргөн пайдабыз тууралуу дайыма кеңири сөз болуп келе жатат. 2020-жылга чейин 1 млн доллар бербеген “Кыргызалтын” быйылкы жылда 200 млн доллар киреше тапты. Мурда жылына мамлекеттен 300 млн сомго чейин дотация алып отурган “Макмал” алтын кени тескерисинче быйыл 670 млн сом таза кирешеге чыкты. “Кыргызалтындын” былтыр жаңы ачылган алтын дүкөнү 1 жылда 735 млн сом таза кирешеге жетишти.
2021-жылга чейин дайыма чыгашага иштеп, мамлекеттик бюджеттин моюнуна минип, дотацияда отурган “Кыргызстан аба жолдору”, “Кыргыз темир жолу” сыяктуу көптөгөн тармактар кирешеге иштей башташты”,- деди Жапаров.
Ошондой эле каражаттар кайдан түшүүдө деп көптөр кызыккан суроолордун жообу ушунда экенин, ушул тармактардан каражаттар түшүп жатканын президент кошумчалады.
