EPS программасы боюнча Кореяда миңден ашык кыргызстандык иштейт
2025-жылы Кыргызстандын 4 миң 315 жараны Кореяга ишке орношуу маселеси боюнча EPS программасынын алкагында консультация алуу үчүн кайрылышканын Эмгек министрлиги маалымдады.
Анын маалыматына ылайык, Иш менен камсыз кылуу жана эмгек министрлиги менен түзүлгөн меморандумдун негизинде Кыргыз Республикасынын жарандарын иштөөгө уруксат берүү системасы (EPS) аркылуу жумушка орноштуруу программасы ишке ашырылып жатат. Бул программа 2007-жылдан бери иштеп келет жана ар эки жыл сайын узартылып турат.
Программага катышуу үчүн корей тилин билүү боюнча тестирлөөнүн эки этабы өткөрүлгөн. Анын жыйынтыгында:
- 1 миң 350 адам экзаменге катышкан;
- алардын ичинен 339 талапкер тесттен ийгиликтүү өткөн;
- 225 адам эмгек келишимине ээ болгон;
- 232 кыргызстандык ишке чыгып кеткен, анын ичинде 30 аял бар.
Ишке орношкон жарандардын көпчүлүгү:
- тамак-аш өнөр жайы,
- химия өнөр жайы,
- кагаз өнөр жайы,
- пластик, резина жана айнек буюмдарын өндүрүүчү заводдордо
эмгектенишүүдө.
Орточо эмгек акысы 1,7 миң долларды түзөт.
