Курултайда Жерүй алтын кенин мамлекетке алуу маселеси коюлду
Бишкек шаарынан келген делегат Долос Муратов IV Элдик курултайдын алкагында медицина тармагын өнүктүрүү үчүн Жерүй алтын кенин мамлекетке кайтарууну сунуштады
Ал Бишкек шаарында жана өлкөнүн бардык жети облусунда заманбап нейрохирургия, кардиоинсульт, реабилитация, офтальмология борборлорун керектигин билдирди.
"Каражатты кайдан алабыз деген суроого мындай деп жооп берем. Кумтөр сыяктуу эле Жерүй кенин мамлекетке кайтарып алсак, бул өлкөгө миллиарддаган пайда алып келмек", — деди ал.
Мындан тышкары, Долос Муратов “Дастан” заводунда медицина үчүн керектүү титан жана башка материалдарды чыгаруу боюнча станокторду орнотууну да сунуштады.
Эске салсак, Жерүй — алтын-кварц формациясына таандык кен, Талас облусунун Талас районунда жайгашкан. Кенди иштетүү укугу "Альянс Алтын" компаниясына таандык.
Юстиция министрлигинин маалыматына ылайык, компаниянын жетекчиси — Сабир Рахматов. "Альянс Алтын" ЖЧКсынын негиздөөчүсү — "Чыгыш-геологиялык өндүрүшү" компаниясы болуп саналат. Россиялык ММКлардын маалыматы боюнча, бул компания "Русская платина" ЖЧКлар тобуна кирет.
"Альянс Группасынын" президенти жана "Русская платинанын" тең ээси — Муса Бажаев.
