Кумтөрдүн жылдык кирешеси 124,2 млрд сомдон ашты
2025-жылдын январь–декабрь айларынын жыйынтыгы боюнча "Кумтөр Голд Компани" ЖАКтын өндүрүштүк ишмердүүлүктөн түшкөн кирешеси 124 млрд 216 млн сомдон ашты. Бул тууралуу ишкананын 2025-жыл үчүн расмий отчетунда айтылат.
Маалыматка ылайык, компаниянын таза кирешеси 59 млрд 286 млн сомду түзгөн. Ал эми жыл аягына чейин Кумтөр кенинде алтын өндүрүүнүн көлөмү 12 тоннадан ашат деп күтүлүүдө.
Өндүрүштүк көрсөткүчтөрдүн негизинде компания мамлекеттик бюджетке олуттуу салым кошту. Тактап айтканда, 2025-жылдын ичинде:
- салыктар жана милдеттүү төлөмдөр 21,5 млрд сомдон ашты;
- мамлекетке дивиденд катары 13 млрд 48 млн сом төлөндү.
Ошентип, "Кумтөр Голд Компани" тарабынан 2025-жылы мамлекетке төлөнгөн жалпы каражаттын көлөмү 34,5 млрд сомдон ашты.
