Кыргызстанда нотариат системасын колдонууга акы киргизүү сунушталды
Министрлер кабинети Бирдиктүү нотариат маалымат системасын (БНМС) колдонуу үчүн акы киргизүү боюнча токтом долбоорун коомдук талкууга чыгарды.
Документке ылайык, акы нотариалдык аракеттерди жүргүзүү учурунда алынат жана жеке нотариустарга тиешелүү — системаны колдонуу менен техникалык кызматтарды көрсөтүү үчүн төлөм алынат.
Анын өлчөмүн Министрлер кабинетинин алдындагы Экономика жана коммерция министрлигинин Антимонополиялык жөнгө салуу кызматы менен макулдашуу аркылуу Юстиция министрлиги аныктайт.
Жыйналган каражаттар БНМСти техникалык колдоо жана тейлөө, киберкоопсуздукту камсыз кылуу, маалыматтарды резервдик сактоо, ошондой эле система үчүн жаңы функционалдык модулдарды өнүктүрүүгө багытталат. Төлөмдөр QR-коддорду камтыган интеграцияланган электрондук төлөм сервистери аркылуу жүргүзүлөт.
