Кыргызстанда халал-индустриясынын талаптарын бузгандарга айып пул салынат
Экономика жана коммерция министрлиги "Кыргыз Республикасындагы халал-индустриясы жөнүндө" мыйзамда каралган талаптарды бузгандыгы үчүн айып пул салууну сунуштайт. Бул тууралуу министрдин орун басары Султан Ахматов Жогорку Кеңештин финансы, бюджет, ишкердик жана атаандаштыкты өнүктүрүү боюнча комитетинин жыйынында билдирди.
Учурда Укук бузуулар жөнүндө кодекске тиешелүү өзгөртүүлөр али киргизиле элек. Ушуга байланыштуу мыйзам долбоору менен Кодекске "Халал-индустриясы чөйрөсүндөгү Кыргыз Республикасынын мыйзамдарынын талаптарын бузуу" деген жаңы берене киргизүү сунушталып жатат.
Аталган беренеге ылайык, тастыктоочу документтери жок халал-продукцияны жана халал-кызматтарды жүгүртүүгө чыгаргандыгы үчүн:
- жеке жактарга 7 500 сом,
- юридикалык жактарга 23 000 сом өлчөмүндө айып пул салуу каралган.
Халал-продукциянын жана халал-кызматтардын талаптарга шайкештигин тастыктоо жол-жобосун бузгандыгы үчүн юридикалык жактарга 13 000 сом айып пул салуу сунушталууда.
Министрдин орун басары Кыргызстанда халал-продукция боюнча сертификаттар мыйзам бузуу менен алынган учурлар болгонун белгиледи.
"Мыйзамда аккредитация кандай тартипте өтүшү керектиги так көрсөтүлгөн. Кээ бир учурларда продукция халал деп аталып, бирок анын курамында чочконун эти болгон. Мындай көрүнүш “Риха” компаниясында аныкталган. Алар аккредитациядан туура эмес өткөн. Биз алардын лицензиясын кайтарып алдык", — деди Султан Ахматов.
