“Виртуалдык активдер жөнүндө” Мыйзамга өзгөртүүлөр киргизилди
Президент Садыр Жапаров “Виртуалдык активдер жөнүндө” Кыргыз Республикасынын Мыйзамына өзгөртүүлөрдү киргизүү тууралуу документке кол койду. Мыйзам 2025-жылдын 24-декабрында Жогорку Кеңеш тарабынан кабыл алынган.
Мыйзамдын максаты — виртуалдык активдер чөйрөсүндөгү мамлекеттик жөнгө салуунун натыйжалуулугун жогорулатуу, ошондой эле Кыргыз Республикасынын виртуалдык активдер рыногунун туруктуулугун жана ачыктыгын камсыз кылуу.
Документте “стейблкоин (stablecoin)”, “реалдуу актив менен камсыздалган токен (RWA Token)”, “мамлекеттик майнинг” жана “мамлекеттик криптовалюта резерви” сыяктуу түшүнүктөрдүн аныктамалары такталган.
Ошондой эле мыйзам президентке белгилүү бир мөөнөткө айрым аймактарда пилоттук жөнгө салуучу чөйрө түзүү аркылуу виртуалдык активдер боюнча инновациялык технологияларды апробациялоо укугун берет. Аталган чөйрөдө лицензиялоо жана уруксат берүүчү документтерди берүү ыйгарым укуктуу орган аркылуу жүзөгө ашырылат.
Мыйзамда майнинг жүргүзгөн жеке ишкерлер жана юридикалык жактар каттоодон өтүүгө милдеттүү экени белгиленген. Каттоодон өткөн субъекттер сертификат алган күндөн тартып майнингди жүргүзө алат.
