Кыргыз ювелирлери Италиянын Bvlgari академиясында окушат
Мамлекеттик салык кызматынын төрагасы Алмамбет Шыкмаматов Италияга болгон иш сапарынын алкагында Виченца шаарында өтүп жаткан Vicenzaoro эл аралык зергерчилик көргөзмөсүнө катышты. Бул көргөзмө зергерчилик тармагындагы негизги B2B аянтчалардын бири болуп саналат.
Көргөзмөнүн жүрүшүндө МСКнын төрагасы зергерчилик рыногунун заманбап тенденциялары, жаңы материалдар жана технологиялар менен таанышып, Италиянын жана башка өлкөлөрдүн алдыңкы компанияларынын өкүлдөрү менен сүйлөшүүлөрдү өткөрдү.
Жолугушуулар учурунда кыргыз тарап өлкөдөгү зергерчилик тармагынын учурдагы абалын, жүргүзүлүп жаткан реформаларды жана мамлекеттик колдоо чараларын тааныштырды. Кыргызстан чийки затты кайра иштетүү жана жогорку кошумча наркы бар продукцияларды өндүрүү үчүн перспективдүү аянтча катары чоң мүмкүнчүлүккө ээ экени белгиленди.
Жыйынтыгында тараптар кыргызстандык зергерлерди Bvlgari академиясынын базасында окутуу боюнча макулдашууга жетишти. Мындан тышкары, заманбап жабдууларды жеткирүү, баалуу металлдарды анализдөөгө багытталган лабораториялык технологияларды киргизүү жана республика ичинде толук өндүрүш циклын уюштуруу мүмкүнчүлүктөрү талкууланды.
