Мамлекеттик мүлктөрдү баалоо стандарттарына өзгөртүүлөр кирет
Экономика жана коммерция министрлиги 2026-жылдын 23-январында Министрлер кабинетинин "Кыргыз Республикасынын аймагында баалоочулар жана баалоо уюмдары тарабынан милдеттүү түрдө колдонулуучу мүлктү баалоо стандарттарын бекитүү жөнүндө" 2025-жылдын 16-октябрындагы №673 токтомуна өзгөртүүлөрдү киргизүү тууралуу токтом долбоорун коомдук талкууга чыгарды.
Долбоор мамлекеттик мүлк объекттерин Министрлер кабинети менен инвестордун ортосунда түзүлгөн инвестициялык макулдашуулардын алкагында, түз сүйлөшүүлөр аркылуу инвесторго өткөрүп берүүдө алардын рыноктук наркын аныктоо тартибин тактоону сунуштайт.
Сунушталып жаткан өзгөртүүлөргө ылайык:
- мындай объекттердин рыноктук наркы инвестициялык макулдашуунун шарттарын эске алуу менен аныкталууга тийиш. Ага инвесторго өткөрүлө турган укуктардын курамы жана көлөмү, тараптардын милдеттенмелери жана башка шарттар кирет;
- мамлекеттик мүлк объекттеринин ээси тарабынан берилген нарк боюнча сунуштарды, инвестициялык долбоордун баасын жана башка көрсөткүчтөрдү кошумча маалымат катары пайдаланууга жол берилет;
- инвестициялык макулдашуунун шарттарын эске алуу аныкталган наркты инвестициялык, атайын же башка рыноктук эмес наркка киргизүүгө негиз болбой турганы бекитилет.
Ошондой эле кыймылсыз мүлктү баалоо стандартына толуктоо киргизүү сунушталууда.
Мындан тышкары, баалоо отчетунун мазмунуна коюлган талаптарга төмөнкү маалыматтарды камтуу сунушталууда. Инвестициялык макулдашууну ишке ашыруу үчүн даярдалган отчетто:
- инвесторго өткөрүлө турган укуктардын курамы жана көлөмү;
- тараптардын милдеттенмелеринин курамы жана көлөмү;
- инвестордун чыгымдарынын эсептөөсү көрсөтүлүшү керек.
