Ломбарддардагы максималдык ставка 30%дан ашпайт
Финансылык рынокту көзөмөлдөө, тескөө жана мониторинг жүргүзүү бөлүмүнүн башкы адиси Сүйөркул Ашимжан уулу радионун түз эфиринде ломбарддардагы насыялар боюнча жаңы пайыздык чендер тууралуу айтып берди.
Анын айтымында, 2018-жылдан тарта киргизилген ишкерлерди текшерүүгө мораторий чакан жана орто бизнести, анын ичинде ломбарддарды колдоо максатында кабыл алынган.
Ошол эле учурда, мораторий күчүндө турган мезгилде да жарандарды коргоо механизмдери сакталып келгенин белгиледи. Тактап айтканда, мыйзам бузуу боюнча кайрылуулар түшкөн учурда ыйгарым укуктуу мамлекеттик органдар пландан тышкаркы текшерүүлөрдү жүргүзүп, конкреттүү маселелерди чечүүгө укуктуу болгон.
2024-жылдын 23-майынан тартып "Ломбарддардын ишмердүүлүгү жөнүндө" мыйзамга өзгөртүүлөр киргизилип, анда насыялар боюнча пайыздык чендерди жөнгө салуу каралган. Улуттук банк ар 6 ай сайын орточо номиналдык эффективдүү пайыздык ченди эсептеп чыгат жана ага 12% кошулат.
2026-жылдын 30-июнуна карата орточо номиналдык пайыздык чен 17,17%ды түзгөн. Ал эми мыйзамга ылайык, бардык түрдөгү күрөө мүлк үчүн насыянын жылдык эң жогорку уруксат берилген пайыздык чени 29,99%ды түзөт.
