Кыргызстан 2026-жылга СПЕКА программасынын төрагасы болуп шайланды
23-январда Ашхабад шаарында өткөн СПЕКА жумалыгынын алкагында Программанын Башкаруу кеңешинин 20-сессиясы жана СПЕКА Фондунун Башкаруу комитетинин экинчи отуруму болуп өттү. Бул тууралуу Экономика жана коммерция министрлигинен билдиришти.
Иш-чаралардын жыйынтыгында Кыргызстан 2026-жылга СПЕКА программасынын төрагасы болуп шайланды. Төрагалык Кыргызстан үчүн эл аралык аренадагы позициясын бекемдөөгө, улуттук кызыкчылыктарды илгерилетүүгө жана Программанын туруктуу өнүгүүсүнө салым кошууга багытталган мүмкүнчүлүктөрдү ачат.
Ошондой эле жыйындын жүрүшүндө СПЕКА Фондун иш жүзүндө ишке киргизүү үчүн зарыл болгон негизги документтер кабыл алынды. Фонддун ишмердүүлүгүндөгү артыкчылыктуу багыттардын бири Кыргыз Республикасынын аймагында ар кандай долбоорлорду ишке ашыруу болуп саналат.
Маалымат үчүн, СПЕКА программасынын Жетекчи кеңеши жыл сайын жыйын өткөрүп, Программанын жалпы ишмердүүлүгүн координациялайт. Кеңеш стратегиялык артыкчылыктарды аныктоо, иш пландарын бекитүү, отчетторду кароо жана тематикалык жумушчу топтордун иши боюнча чечимдерди кабыл алуу менен алектенет.
