Мамлекетке 530 млн сомдон ашык каражат жана мүлк кайтарылды
Мамлекеттин пайдасына 530 млн сомдон ашык каражатка бааланган мүлктөр өндүрүлдү. Бул тууралуу Башкы прокуратурага караштуу Сот аткаруучулар кызматынан билдиришти.
Мамлекеттик салык кызматынын, Мамлекеттик бажы кызматынын, мэриялардын жана жергиликтүү өз алдынча башкаруу органдарынын пайдасына 185 млн 588 миң сом өндүрүлдү. Ошондой эле аткаруу өндүрүшүнүн алкагында мамлекеттин пайдасына жалпы баасы 344 млн 924 миң сомду түзгөн кыймылдуу жана кыймылсыз мүлккө өндүрүп алуу чарасы колдонулду.
Аткаруу документтеринин көлөмү дагы бир топ өскөндүгү белгиленди. 2024-жылы Сот аткаруучулар кызматына 315 миң 932 документ келип түшкөн, анын ичинен 200 миң 273ү аткарылган, бул өндүрүштө турган жалпы сандын 63,3%ын түзгөн.
2025-жылы келип түшкөн документтердин саны 495 миң 849га чейин көбөйүп, мурунку жылга салыштырмалуу 179 миң 917 документке же болжол менен 57%га көп болгон. Былтыр иш жүзүндө аткарылган документтердин саны 370 миң 760 жетип, өндүрүштө турган жалпы сандын 86,5%ын түзгөн.
Бул көрсөткүчтөр документ жүгүртүүнүн олуттуу көбөйүшүн гана эмес, аткаруу деңгээлинин өсүшүн дагы айгинелейт.
Жетишилген натыйжалар президенттин жарлыгы менен демилгеленген сот актыларын аткаруу системасын реформалоонун, ошондой эле Сот аткаруучулар кызматы Башкы прокуратуранын түзүмүнө өткөндөн кийин координацияны, контролду жана башкаруу механизмдерин күчөтүүнүн аркасында мүмкүн болгондугу айтылды.
