Документтери жок зер буюмдарды мыйзамдаштыруу тартиби
Мамлекеттик салык кызматы алгачкы документтери жок баалуу металлдардан жасалган зер буюмдар боюнча салык төлөөчүлөр жоопкерчиликтен жана салык агентинин милдеттенмелерин аткаруудан бошотулушу мүмкүн экенин маалымдайт.
Бул үчүн 2026-жылдын 1-мартына чейин esf.salyk.kg сайтындагы электрондук эсеп-фактуралардын маалыматтык системасында тиешелүү электрондук документти тариздөө зарыл.
Документти тариздөө үчүн системага кирип, “Сатып алуу” бөлүмүн, андан соң ББЭД бөлүмчөсүн тандап, “Кошуу” баскычын басуу керек. Ачылган терезеден “Баалуу металлдардан жасалган зер буюмдар жөнүндө маалыматтарды киргизүү” талаасын белгилөө талап кылынат.
Бул параметр тандалганда электрондук документтин негизги реквизиттери автоматтык түрдө түзүлөт. Салык төлөөчү документтин товардык бөлүгүн гана Мамлекеттик салык кызматынын белгиленген тартибине ылайык толтурат.
Маанилүү: бул электрондук документти оңдоого же жокко чыгарууга мүмкүн эмес. Киргизилген маалыматтар милдеттүү түрдө эсепке алынгандыктан, бардык маалыматтар так, толук жана катасыз толтурулушу керек.
