Бизнести текшерүүгө 2026-жылдын аягына чейин мораторий киргизүү сунушталды
Ишкердик субъекттерин текшерүүгө убактылуу тыюу салууну киргизүү боюнча Президенттин жарлыгынын долбоору коомдук талкууга чыгарылды. Документ бизнеске болгон административдик басымды азайтуу жана экономикалык активдүүлүктү турукташтыруу максатында иштелип чыккан.
Долбоордо белгиленгендей, ишкерлер укук коргоо органдары, салык кызматы, башка көзөмөлдөөчү мекемелер жана жергиликтүү администрациялар тарабынан жүргүзүлгөн ашыкча жана кайталанма текшерүүлөр боюнча массалык түрдө даттанып келишет.
Жарлыктын долбоорунда 2026-жылдын 31-декабрына чейин бизнеске карата бардык текшерүүлөргө мораторий киргизүү сунушталууда.
Өзгөчө учурлар катары кылмыш жана жарандык сот өндүрүшүнүн алкагындагы текшерүүлөр, ишкерлердин өз кайрылуулары, чет мамлекеттердин мамлекеттик органдарынын сурамдары, жарандардын даттануулары, ошондой эле мыйзам бузуулар тууралуу так маалымат камтылган ЖМКлардагы жарыялар жана Салык менен Бажы кызматтарынын иш-аракеттери каралган.
Мораторий мезгилинде көзөмөлдөөчү органдар тек гана мониторинг жүргүзүүгө жана консультация берүүгө укуктуу болуп, айып пул салууга же өз демилгеси менен текшерүү жүргүзүүгө укугу болбойт.
Ишкердик субъекттери консультациялык иштин алкагында зарыл болгон маалыматтарды берүүгө милдеттүү, бирок бул маалыматтар мораторий аяктаганга чейин текшерүүлөрдү жүргүзүү үчүн колдонулбайт.
