Быйыл ишкерлерге 6% менен насыя берилет
Быйыл ишкерлерге 6% менен насыя берилерин “Ишкердикти өнүктүрүү фонду” микрокредиттик компаниясы ААК башкармалыгынын төрагасынын орун басары Адилет Камчыбеков “Биринчи радионун” эфиринде билдирди.
Анын айтымында, насыя ишкерлерге мамлекеттик колдоо аркылуу 300 миң сомдон 5 млн сомго чейин берилет. Жалпысынан фонд тарабынан 500 млн сом өлчөмүндө насыя берүү каралган.
“Каражаттын 60%ы аймактардагы ишкерлерге берилет. Насыя ала тургандардын 30%ы аялдар болушу керек. Продукция өндүрүүчүлөргө насыя 3 жылдык мөөнөткө берилет. Эгерде, имараттарды жаңыртуу жана жабдууларды сатып алуу пландалган болсо, насыянын мөөнөтү 5 жылды түзөт. Ошондой эле фонд бизнеске тиешелүү кредиттерди жаап бере алат. Мөөнөтү 18 айга чейин”, - деди ал.
Адилет Камчыбеков белгилегендей, 2025-жылы 500 млн сом өлчөмүндө насыялар 8% менен миңге чукул ишкерге берилген.
